“É unha parte da historia de Galicia que se descoñece, que permaneceu practicamente invisibilizada e da que existen poucos documentos e materiais”. Con estas palabras, a comisaria Ofelia Rey presenta unha das grandes mostras sobre a historia da navegación galega e o papel da nosa terra no descubrimento dun novo mundo: a ' Inventio Mundi', unha exposición que tras permanecer no Museo do Mar de Vigo, agora pódese gozar na sede da Fundación Barrié na Coruña

Ata o próximo 25 de outubro, todos aqueles que o desexen poden profundar nun relato magníficamente trazado que, a través de pouco máis de trinta paneis, detalla a historia da navegación galega, que arrinca nese interese comercial coas Illas Molucas e finaliza no século XVII, cando cambian as formas de navegación.

Unha historia e un relato no que A Coruña tivo un papel destacado. A creación da Casa de Contratación da Especiería supuxo un importante impulso económico para a cidade, pero tamén un foco de atracción de piratas. A duración desta institución foi breve. En 1529, tan só sete anos despois da súa creación, desapareceu como resultado dos acordos alcanzados entre España e Portugal no tratado de Zaragoza, no que se cedía ao país veciño os seus dereitos sobre as illas das Especias a cambio dunha gran suma de diñeiro.

'A Galicia navegante no imaxinario literario'

A posición atlántica de Galicia é fundamental para comprender a especificidade da cultura galega. Por iso, a través de ' Inventio mundi' tamén se recupera como se mantiveron no noso imaxinario popular os feitos históricos. Na literatura galega medieval, o Atlántico é o Mar Maior, cantado por Paio Gómez Chariño, o poeta almirante sepulto na igrexa de San Francisco de Pontevedra, a Boa Vila, porto importante aínda a finais do século XV.

Pero hai máis, a historia do Colón pontevedrés; o Fernando de Magalhães que naceu na aldea de Magaláns, na mesma ría; pero tamén na literatura contemporánea en obras como O triángulo inscrito na circunferencia de Víctor Freixanes, entre moitas outras achegas. Unha conexión que tamén está presente na mostra e sobre a que se profundará nunha das actividades complementarias previstas. O próximo día 18, Pemón Bouzas, Marilar Aleixandre e Manuel Bragado, coordinados por Olivia Rodríguez, participarán na charla A Galicia navegante no imaxinario literario e a que profundarán, a través das súas propias experiencias, na relación entre a literatura galega e as historias de navegacións mariñas.

O Parque Tecnolóxico de Galicia ten posto en marcha o prazo de inscripción para as Steam Kids Tecnópole e Aulas Tecnópole, os cursos de formación en habilidades científicas e innovadoras para estudantes de entre 8 e 18 años. A matrícula estará abierta ata o próximo 30 de setembro.

STEAM Kids Tecnópole busca ofrecer aos máis novos, por sexto ano consecutivo, unha aproximación innovadora ao mundo da ciencia e a tecnoloxía desde unha óptica artística e creativa. Diríxese a escolares de entre 8 e 11 anos, cun límite de 25 asistentes.

O programa consta dun conxunto de actividades que xiran arredor de distintos campos de coñecemento e que requiren do uso de todo tipo de habilidades, tal como sucede na vida real. Os participantes levarán a cabo pequenas investigacións, construirán robots programables, aprenderán a programar, terán a oportunidade de voar drons, deseñarán instalacións artísticas de base tecnolóxica, superarán retos interdisciplinares e descubrirán a maxia das matemáticas.

Aulas Tecnópole para mozos de 12 a 18 anos

Por su parte, as Aulas Tecnópole, que este ano alcanzan a súa undécima edición, están pensadas para espertar vocacións científicas e incentivar o espírito emprendedor entre o alumnado de 12 a 18 anos. As prazas están limitadas a 40 asistentes.

Os estudantes, todos eles de Secundaria e Bacharelato, reciben formación sobre as pautas que debe seguir unha investigación científica rigorosa e a estrutura que debe ter a memoria escrita na que se recolla o proxecto. Os seus ámbitos de traballo abranguen todas as áreas do coñecemento, desde as novas tecnoloxías e a informática ata as ciencias ou as humanidades.

Os participantes no curso terán ocasión de presentar os seus proxectos en Galiciencia, a feira científica máis importante de Galicia que promove Tecnópole, e noutros certames nacionais como “Jóvenes Investigadores” do Ministerio de Ciencia e Innovación.

A 'nova normalidade' está marcada por moitas cousas que xamais pensamos en vivir. Algunha delas, sen dúbida, retrotrae á añoranza, á necesidade de recuperar, nalgún momento, aquela 'vella normalidade' ou 'normal normalidade' henchida de bicos e de abrazos, e carente de calquera tipo de máscara insoportable

Ninguén sabe canto falta para chegar ata aí, pero todos coinciden en que o paso previo, ineludible, é a consecución dunha vacina eficaz. A primeira, rexistrada polos rusos, despexou esta semana parte do escepticismo xerado tras publicar a prestixiosa revista 'The Lancet' un artigo no que se afirma que os seus primeiros resultados da vacina son prometedores: é segura e xera anticorpos

Son as conclusións das fases uno e dúas dun ensaio realizado por agora en 78 persoas de entre 18 e 60 anos, e que na súa fase tres prevé alcanzar a uns 40.000 cidadáns. Un escenario no que comeza a pensarse xa na distribución da vacina Sputnik V -nome que homenaxea ao primeiro satélite lanzado ao espazo en 1957-, e que en España correrá a cargo da empresa galega IberAtlantic.

"Estamos especialmente satisfeitos da confianza depositada por Roscongress -fundación rusa que remitiu a proposta de distribución- para a achega na distribución e o alcance da vacina rusa e axudar a paliar os efectos tan negativos desta pandemia”, afirma Pedro Mouriño, CEO de IberAtlantic

Á espera dun prazo concreto 

Segundo informan as autoridades rusas, a vacina garante unha inmunidade estable, por un período de ata dous anos, e foi autorizada por estar a súa seguridade probada segundo os estándares e normativas do país. O Goberno ruso está a producir a vacina e iniciou unha campaña de inoculación, en primeira instancia e de maneira voluntaria, a persoas traballadoras dos sectores sanitario e educativo.

Aínda non existe prazo concreto para a comercialización da vacina rusa, xa que o fármaco ten que superar os trámites necesarios para o cumprimento das normativas europea e española, que son moi esixentes.

“Non falamos de prazos, senón de cumprimento de normativas. Non podemos dicir con exactitude canto prolongarase o proceso cara á comercialización, isto depende dos organismos europeos”, afirma Irina Krivich, responsable de desenvolvemento de negocio en IberAtlantic para o mercado de Rusia & CIS.

IberAtlantic está a acompañar o proceso como socio en España e como ponte cara ao mercado iberoamericano e africano. “Nós somos unha empresa que facemos trading… é dicir, de comercio internacional, e estamos orientados a mercados de África e Iberoamérica”, apunta Mouriño. E engade: “Aínda é pronto para falar as condicións e termos concretos da colaboración, que podería concretarse baixo distintas modalidades”. IberAtlantic podería buscar alianzas para a distribución ou fabricación da vacina rusa mediante unha licenza de patente, ou podería actuar como axente no apoio para a aprobación da vacina.

O proceso de comercialización internacional da vacina rusa, xa sexa no ámbito nacional, europeo ou iberoamericano, aínda debe superar diferentes etapas e tramites regulatorios, aínda que o seu rexistro en Rusia dá esperanzas para lograr unha protección duradeira e así deter a pandemia.

Galicia redobra a súa aposta pola industria aeroespacial dando continuidade á iniciativa estratéxica para o desenvolvemento tecnolóxico e industrial no ámbito dos vehículos non tripulados: a Civil UAVS Initiative.

Tras cinco anos de execución (2015-2020), a Civil UAVs, que conta co apoio do Ministerio de Ciencia e Innovación e do Instituto Nacional de Técnica Aeroespacial ( INTA) do Ministerio de Defensa, consolídase como unha iniciativa sen precedentes no ámbito da industria de drons e a tecnoloxía aeroespacial en España e en Europa, tras a publicación das consultas ao mercado para o deseño de actuacións no período 2021-2025. O obxectivo do Goberno galego é alcanzar un investimento público-privado similar, polo menos, á do período que agora conclúe: 164 millóns de euros.

A Civil UAVs Initiative situou a Galicia no centro do desenvolvemento de alta tecnoloxía aeroespacial no segmento dos vehículos non tripulados, dando como resultado a creación dun aeródromo de referencia en Rozas (Lugo), un centro mixto de I+D, un parque industrial especializado e a realización de 59 proxectos de I+D mediante acordos con 52 empresas para a creación de ata 120 novos produtos e solucións de alta tecnoloxía. Ata a data, estas actuacións tiveron como efecto a creación de preto de 500 postos de traballo de tecnólogos en Galicia”.

Colaboración público-privada

A aposta polo desenvolvemento do sector aeroespacial en Galicia baséase na colaboración público-privada, para o que o goberno galego alcanzou acordos de asociación con grandes empresas do sector como a estadounidense Boeing, a española Indra ou a británica Babcock, así como outros acordos para o desenvolvemento de proxectos e solucións con máis de 50 empresas e centros de investigación.

Os investimentos da Xunta defínense en colaboración con estas empresas, a través de procesos de compra pública de innovación, nos que a Xunta expón retos e as empresas soluciones tecnolóxicas aos mesmos, baseadas nas súas estratexias de I+D+i. Isto garantiu o desenvolvemento de tecnoloxía no sector aeroespacial, aumentando as capacidades da industria vinculada á iniciativa.

Para continuar este proceso, publicáronse unhas novas consultas ao mercado, disponibles na web de la iniciativa, nas que se chama a todas as empresas con intereses no mundo dos drons para expor proxectos de I+D e industriais.

O programa Oportunius, enmarcado na Estratexia Retorna 2020 promovida polo goberno galego, naceu co obxectivo de xerar, captar e reter talento investigador na nosa terra. Unha meta que volve alcanzar grazas á incorporación, á Universidade de Vigo, de dous mozos investigadores seleccionados nas prestixiosas bolsas europeas ' Starting Grant': Mario Pansera e a galega Sara Varela.

Estas bolsas, outorgadas polo Consello Europeo de Investigación, abarcaron na súa última convocatoria a 436 proxectos gañadores, 23 deles de España. “Son unhas axudas tremendamente competitivas, é como gañar unha medalla nas Olimpíadas”, destaca a vicerreitora de Investigación da Universidade de Vigo, Belén Avermellado. 

Grazas a elas, e o longo do próximos cinco anos, o italiano Mario Pansera levará a cabo unha investigación que ten como obxectivo analizar como sería unha sociedade capaz de prosperar sen necesidade dun crecemento económico continuo, explorando “novas formas de organizar a produción máis sostibles e xustas”. Pola súa banda, Sara Varela retornará ao seu Vigo natal para desenvolver unha liña de traballo que, a través da interacción entre clima, xeografía e vida, busca avanzar no coñecemento dos procesos que levan á aparición e desaparición de especies. Ambos os proxectos suman, cada un, 1,5 millóns de euros para o seu desenvolvemento. 

"Un futuro científico moi prometedor"

“A incorporación destes dous investigadores significa a apertura dun futuro científico moi prometedor e punteiro na UVigo, tanto no ámbito das ciencias sociais, no caso de Mario Pansera, como no ámbito científico, no de Sara Varela”, razoa Avermellado, que lembra que os seus proxectos traerán aparellada a “atracción de máis talento” coa incorporación doutros “investigadores relevantes”, así como “un incremento das publicacións en revistas de prestixio”, que redundará “nun mellor posicionamento nas clasificacións da UVigo”.

Para Pansera, actualmente profesor axudante na Universitat Autónoma de Barcelona supón “unha oportunidade única para acelerar a miña carreira académica”. Prospera ( Prospering without growth: Science, Technolohy and Innovation in a post- growth era) é o nome dun proxecto que, nas súas propias palabras, “abre a posibilidade de crear na UVigo un grupo de investigadores moi ben conectados a nivel internacional” e que foi un dos 126 seleccionados na liña de Ciencias Sociais e Humanidades.

Tras doutorarse en Management pola Universidade de Exeter, Pansera desenvolveu unha estancia post doutoral en Bruxelas, a través dunha bolsa Marie Curie, para logo traballar como investigador na Universidade de Bristol. A investigación e innovación responsable ( RRI) e a innovación para a sustentabilidade centran as liñas de traballo de Pansera, que se incorporará á UVigo a comezos de 2021.

Meses antes retornará a Vigo Sara Varela, actualmente investigadora no Museo de Historia Natural de Berlín. Tras licenciarse en Bioloxía na UVigo e realizar a súa tese de doutoramento no Museo Nacional de Ciencias Naturais de Madrid, o seu labor investigador levouna á República Checa, Brasil e Alemaña, antes de obter con esta bolsa a oportunidade de “consolidar a miña carreira como investigadora”. “É unha oportunidade única para desenvolver un proxecto multidisciplinar e complexo, que necesita dun equipo grande e estable de investigadores", destaca Varela. 

É posible prosperar sen crecer?

Partindo da posta en cuestión de se as economías poden crecer eternamente e se ese crecemento económico perpetuo é “factible e desexable”, Mario Pansera centrará a súa investigación en “explorar como sería unha sociedade que prospera sen necesidade de aumentar de maneira indefinida indicadores como o PIB”. O investigador pregúntase neste proxecto se “habería espazo para a innovación nun modelo “poscrecemento”, xa que, ao seu xuízo, “desenredar a innovación do crecemento é a clave para imaxinar unha era” non baseada nun crecemento “insostible”.

Pansera incide nese senso en que innovar tense convertido “nun imperativo para a supervivencia e expansión de calquera forma de organización”, polo que serán precisas “novas narrativas para a innovación”, que vaian máis aló da tecnoloxía e impliquen un “cambio cultural e institucional”. Deste xeito, a súa investigación buscará dar resposta ás preguntas de “como serían as organizacións nun sistema que non se basea nun crecemento sen fin; que niveis de complexidade tecnolóxica podemos alcanzar nunha economía que non crece; e que políticas, infraestruturas e formas organizativas se precisan para este novo paradigma da innovación”. 

Deste xeito, o proxecto seleccionado polo ERC, destaca, “crea as condicións para que a UVigo se poña en primeira liña na investigación sobre economías e organizacións alternativas, centradas no benestar das persoas e non na maximización dos beneficios económicos”, permitindo explorar, “en tempos da covid-19, novas formas de organizar a produción que sexan máis sustentables e xustas”. 

O ciclo de concertos 'Galicia Emerxe', iniciativa de promoción e difusión de solistas e bandas galegas tras o impacto da pandemia, acaba de comezar no Museo Centro Gaiás da Cidade da Cultura de Galicia de Santiago de Compostela.

Ata finais de setembro, 50 directos de artistas galegos de media hora de duración individual serán gravados en un atractivo formato audiovisual, e emitidos ao longo do ano 2021 en TVG e Radio Galega con motivo do Xacobeo 2021. 

'Galicia Emerxe' é parte do Plan de reactivación dos sectores cultural e turístico que está a impulsar a Comunidade fronte aos efectos do Covid-19. A iniciativa busca ofrecer aos artistas unha nova plataforma de promoción do traballo mediante un atractivo formato audiovisual, deseñado para a súa emisión televisiva e a súa posterior difusión en liña.

Rock, folk, pop, fusión… unha ampla variedade de estilos daranse cita nos concertos de 'Galicia Emerxe', no que figurarán artistas tan coñecidos como Xoel López, Luar na Lubre, Novidades Carminha, Susana Seivane, Mercedes Peón ou Triángulo de Amor Bizarro, que comparten programa con outros que están a despuntar no panorama musical galego, como High Paw & Elephant Yards, Xoana, Blanco Palamera, Faia, Boyanka Kostova, Laura LaMontagne ou Pauliña, entre moitos outros.

Intervención dos protagonistas

O espazo musical desenvolverase ao longo de 50 programas duns 40 minutos de duración que, ademais dos concertos, incluirán a intervención dos seus respectivos protagonistas para falar sobre a súa traxectoria e os seus proxectos máis inmediatos.

As bandas e solistas foron seleccionados por unha comisión artística de entre máis de 700 propostas recibidas, atendendo a criterios como a traxectoria artística, a actividade recente ou a perspectiva de xénero. “De aí, que contemos cunha antoloxía moi compensada en canto a estilos musicais, a presenza de artistas moi consagrados, dentro e fóra de Galicia, xunto a talentos emerxentes que xa están a dar moito que falar”, expón o conselleiro de Cultura e Turismo.

'Galicia Emerxe' é tamén un sopro de aire fresco para a industria musical. Non en balde, ademais das 41 axencias de contratación galegas a través das que participan os 50 artistas seleccionados, o programa mobiliza 21 empresas de servizos musicais, así como máis de 20 técnicos de son dos propios grupos. Neste sentido, están implicadas áreas como produción, son, iluminación, realización e edición de vídeo, deseño gráfico e visual, construción efémera, escenarios e estruturas, hospitalidade, backline, comunicación e, especialmente ante a actual situación, seguridade e prevención de riscos laborais para garantir tamén un estrito protocolo hixiénico-sanitario dos equipos artísticos e técnicos.

Antoloxía de Galicia Emerxe

Os grupos e artistas que pasarán ao longo das próximas semanas polo escenario de Galicia Emerxe no Museo Centro Gaiás son, por orden alfabética: A Banda da Loba, Abraham Cupeiro, Alejandro Vargas, Ataque Escampe, Bala, Banda Crebinsky, Blanco Palamera, Boyanka Kostova, Budiño, Caldo, Dakidarría, De Vacas, Eladio y Los Seres Querido, Faia, Familia Caamagno, Fernando Barroso, Furious Monkey House, Germán Díaz & Benxamín Otero, Ghost Beast, High Paw & Elephant Yards, Holywater, Laura LaMontagne & PicoAmperio, Luar na Lubre, Marcos Teira, Margarita Mariño, María Toro, Mercedes Peón, Mounqup, Novedades Carminha, Pablo Lesuit, Pauliña, Presumido, Rodrigo Romaní, Santi Araujo, Sés, Silvia Penide, Son Trío, Sumrrá, Susana Seivane, Talabarte, Tanxugueiras, Terbutalina, The Soul Jacket, Triángulo de Amor Bizarro, Wöyza, Xan Campos Trío, Xoana, Xoel López e Zënzar.

Na fábrica do futuro, o único estático son os chans, as paredes e os teitos. Todo o demais está en continuo movemento e interconectado. É a transformación dixital da industria, tamén coñecida como 'Fábrica Intelixente'.

O avance incontible da internet tivo un impacto radical na economía e na sociedade do noso século XXI. A converxencia de as tecnoloxías da información (TIC) con a sensórica e a robótica derivaron en o internet das cousas (IoT). O resultado na industria foi un novo modelo organizativo e un cambio disruptivo que algúns denominan a cuarta revolución industrial.

Un escenario no que Galicia quere ocupar o seu lugar, e no que vén traballando desde hai anos. Agora, cunha nova liña que suma máis de 15 millóns de euros para impulsar e promover proxectos estratéxicos de investigación, desenvolvemento e innovación en materia de procesos e organización de empresas industriais con centro de traballo en Galicia. O prazo de solicitude permanecerá aberto ata o próximo 28 de setembro.

Estes proxectos poderán ser individuais ou en colaboración entre empresas ou con organismos de investigación da nosa terra. Ademais, deben ter unha duración mínima de tres anualidades e desenvolverse en Galicia, facendo un uso intensivo de tecnoloxías facilitadoras para obter produtos e procesos de alto valor engadido, en liña coas tendencias internacionais da fábrica do futuro.

Así mesmo, en coherencia co Pacto Verde Europeo, búscase impulsar o desenvolvemento de iniciativas que permitan ás empresas avanzar nos seus compromisos ambientais e enfocar a actividade cara a unha forma de producir máis eficiente baseada no baseada no emprego de tecnoloxías limpas.

Desde a posta en marcha en 2016 deste programa, Galicia suma case 52 millóns de euros destinados a 15 proxectos de 26 empresas e catro centros tecnolóxicos, que permitiron mobilizar 218 millóns en sectores como a automoción, as TIC, o naval, o alimentario, o forestal ou a laxa. 

Principais novidades de esta edición

• Aumento das contías dos proxectos, que poderán ser de entre 2 e 30 millóns de euros.
• Fomento da colaboración efectiva tanto entre grandes empresas con pemes como entre empresas e organismos de investigación.
• Inclusión nos criterios de valoración da consonancia co Pacto Verde e cos principios da innovación responsable.

¡VEN A GALICIA! O SECTOR TIC NECESÍTACHE

Por sexto ano consecutivo, Galicia configúrase como unha das opcións preferidas por miles de cidadáns á hora de emprender os seus distintos proxectos profesionais e persoais. Así o reflicten, unha vez máis, as principais estatísticas de movementos de poboación elaboradas polo Instituto Galego de Estatística - IGE, que subliñan que durante 2019 un total de 46.600 persoas optaron pola nosa terra para fixar a súa residencia. 

Unha cifra que contribúe de modo decisivo a que Galicia arroxe, un ano máis, un saldo migratorio externo moi positivo, paliando os 28.853 veciños que optaron por deixar a comunidade. Así, o ano pasado optaron pola nosa terra como fogar preto de 18.000 persoas máis das que preferiron outras alternativas.

Neste marco, convén destacar que a cifra implica un crecemento do saldo migratorio externo do 43% con respecto a 2018, cando xa a diferenza entre entradas e saídas arroxaba un fluxo favorable de 12.391 para Galicia. Non en balde, a diferenza positiva entre os que veñen e vanos da nosa terra é, en 2019, a máis elevada que se rexistra na Comunidade desde o ano 2008.

Así, eses 46.600 veciños -procedentes do estranxeiro ou doutras comunidades autónomas-, que elixiron Galicia supoñen un incremento do 9% respecto ao ano anterior. Esta cifra é a máis elevada desde 2007 e a segunda máis alta de toda a serie histórica de dita estatística.

Cabe destacar tamén que as 28.853 emigracións representan un descenso do 5% en comparación co 2018. Segundo os datos do IGE, a cifra de persoas que saíron de Galicia é a máis baixa rexistrada desde o ano 2010.

Saldo positivo en todas as provincias

A Explotación de Movementos Migratorios revela tamén que en 2019 as catro provincias galegas gañaron poboación grazas aos movementos migratorios co exterior, tendo en conta que en todas elas as entradas de novas e novos habitantes superaron ás saídas.

Así, a provincia da Coruña alcanzou un saldo migratorio externo de 7.950 persoas, ao rexistrar 19.621 entradas e 11.671 saídas; a de Lugo tivo un saldo de 2.334 persoas, con 5.856 entradas e 3.522 saídas; a de Ourense contabiliza un saldo de 2.289 persoas, con 6.204 entradas e 3.915 saídas; e finalmente, a provincia de Pontevedra obtivo un saldo migratorio externo de 5.174 persoas, con 14.919 entradas e 9.745 saídas. 

O verán chega ao seu fin e a nosa viaxe conclúe na capital de Galicia, Santiago de Compostela, destino de peregrinación da cristiandade dende o século IX.

Dende as augas do mar Báltico e do mar do Norte, miles de peregrinos camiñaron ata o santuario galego e portaron a cuncha de vieira ao longo de todos os camiños de Santiago, verdadeiros camiños de fe. A todo isto hai que sumarlle que, tanto durante o período románico coma durante o barroco, o santuario de Santiago de Compostela exerceu unha influencia decisiva sobre o desenvolvemento da arquitectura, non só en Galicia, senón tamén no Norte da Península Ibérica.

Antes de entrar na catedral, o ideal é percorrer devagar as diversas rúas da zona vella, declarada Patrimonio da Humanidade pola UNESCO e coñecida popularmente como “a améndoa”. A rúa do Franco, cos seus típicos restaurantes, ou a rúa do Vilar, cos seus soportais, conduciranvos ata o seu contorno. Unha vez alí, achegádevos ata a Praza do Obradoiro e mirade ao voso redor: o pazo de Raxoi, sede da Casa do Concello; o Hostal dos Reis Católicos, actualmente Parador Nacional de Turismo; o colexio de San Xerome, sede do reitorado da Universidade e a Catedral forman un marco excepcional que fará que vos sintades pequenos ante semellante conxunto monumental. O son da gaita de fondo enriquecerá, se cabe, a vosa experiencia pois un gaiteiro adoita tocar baixo o arco do Pazo de Xelmírez, así que, xa sabedes, afinade o voso oído!

O programa Emega para incentivar o emprendemento feminino ha aumentado o seu orzamento en case 350.000 euros ata superar os 2,1 millóns co obxectivo de fomentar o autoemprego e o emprego femennio, ademais de facilitar a posta en marcha de mecanismos que permitan a conciliación laboral, persoal e familiar. 

O programa, enmarcado na Estratexia Retorna 2020 do goberno galego, consolídase deste xeito como unha medida para promocionar a participación das mulleres no mercado de traballo e aproveitar o seu potencial para crear novas oportunidades de negocio. A finalidade é que aquelas mulleres que teñades unha idea de negocio poidades materializala contribuíndo a xerar riqueza e novos postos de traballo.

Catro liñas específicas

1. 'Emprende',para promover a posta en marcha de novas iniciativas empresariais e crear emprego feminino estable por conta propia ou allea.
2. 'Innova', para fomentar a implantación de medidas innovadoras para a mellora da competitividade de empresas constituídas por mulleres.
3. 'ITEF', para promocionar iniciativas empresariais con contido científico ou base tecnolóxica promovidas por mulleres.
4. 'Activa', con incentivos para favorecer a reactivación e a consolidación destes negocios con melloras, ampliacións ou cambios de localización que permitan paliar unha situación económica adversa.

Para acceder a esta última liña flexibilizáronse os criterios sen que se requira que o negocio teña máis de tres anos, ademais de valorarse o emprego mantido neste período. Desta forma, preténdese garantir a pervivencia das empresas cunha situación económica complicada, que se vise agravada como consecuencia da crise sanitaria do coronavirus.

O programa Emega conta ademáis cunha axuda complementaria:

• 'Concilia', para promover a conciliación da vida persoal, familiar e laboral nas súas dúas modalidades: a destinada a promotoras e para persoas traballadoras por conta allea.

Coa finalidade de minimizar os efectos que poidan ter os peches de negocios durante o confinamento nos negocios das beneficiarias do programa en edicións anteriores, o Goberno galego xa modificara as bases da convocatoria de 2018 para que o período de execución do proxecto no canto de ser un mínimo de dous anos sexa desde a súa posta en marcha ata a data de inicio do estado de alarma. Na mesma liña, tamén se previu adaptar e flexibilizar as bases da convocatoria do ano pasado.