- A nosa terra sitúase como pioneira na posta en marcha de medidas para facilitar o retorno, con actuacións que promoven o emprendemento e a volta do talento á Comunidade
Galicia mantén a súa aposta polo retorno. E faio co desenvolvemento dunha ambiciosa Estratexia que dá continuidade á posta en marcha fai algo máis dun lustro, incrementando para iso as partidas e actuacións destinadas a facilitar a volta a casa daqueles que desexedes volver á nosa terra. Un proxecto amplo, ambicioso e de carácter transversal, que foi analizado esta fin de semana en Ourense no marco do XIII Consello de Comunidades Galegas.
Este Consello contou coa participación de representantes de casas e centros de Galicia de todo o mundo, e coa presenza do presidente do Goberno galego, Alfonso Rueda, que fixou a meta de favorecer o regreso de 30.000 galegos do exterior. Unha cifra que consolidaría as obtidas pola primeira Estratexia, que superou as previsións iniciais de retorno facilitando o regreso de 28.000 galegos ou descendentes a Galicia.
O desenvolvemento deste programa -a primeira edición foi a primeira estratexia integral de apoio ao retorno posta en marcha en España- busca, por unha banda, facilitar o regreso a todos aqueles galegos e galegas do exterior que opten pola nosa terra para continuar os seus proxectos persoais e profesionais, e, doutro, compensar o saldo vexetativo negativo que rexistra a comunidade.
O obxectivo é que os galegos e galegas ayudeis a construír a Galicia do futuro. Para iso, está a intensificarse o asesoramento, seguimento e apoio integral ás familias no retorno, e tamén a aposta polo emprendemento e o autoemprego dos retornados, en especial no rural galego. Ademais, facilítase o acceso á vivenda a través da incorporación da figura dos retornados e retornadas ás liñas de axuda para aluguer, rehabilitación e compra; promóvese a continuidade educativa dos retornados e retornadas e dos seus familiares; e facilítase a participación nos programas de inclusión sociolaboral, reforzando a capacitación das habilidades transversais máis demandadas polo mercado laboral e apostando por programas de desenvolvemento persoal da mocidade retornada.
O documento inclúe un aumento de propostas especificamente dirixidas aos galegos que queirades retornar, que pasan de contar cun orzamento de 15 millóns de euros a 50. A esta cifra hai que sumarlle aquelas medidas que ofrecen algún tipo de incentivo aos galegos do exterior que decidades regresar á vosa terra, o que eleva o orzamento total a 450 millóns