Galicia segue dando pasos en Intelixencia artificial. Neste sentido, o Goberno galego acaba de desenvolver coa compañía de geoinformación Telespazio Ibérica unha solución tecnolóxica pioneira que permite a utilización de vehículos non tripulados e intelixencia artificial para mapear o crecemento da semente do mexillón na nosa costa cunha porcentaxe de eficacia de ata o 95%.

Esta tecnoloxía, segundo a empresa, permitirá tomar "as mellores decisións", baseadas en datos obxectivos e científicos, para coñecer cal é o mellor momento para recoller a cría do bivalvo por parte dos miticultores e trasladala despois ás bateas para o seu desenvolvemento. Así mesmo, axudará á recollida ordenada de diversas especies que comparten o mesmo hábitat e a "facer máis competitivo un sector, o do mexillón, que ten un gran impacto na economía de Galicia", o primeiro produtor deste molusco en Europa e o terceiro a nivel mundial.

Todo iso nun contexto no que o cambio climático e o aumento da temperatura da auga están a afectar ao crecemento e a produción da semente do mexillón, cada vez máis escasa. De feito, o inicio da campaña deste ano atrasouse debido ás altas temperaturas que alcanzou este verán a auga das rías.

A industria do mexillón en Galicia produce unhas 250.000 toneladas deste molusco cun valor que en 2022 situouse ao redor dos 150 millóns. Nel participan algo máis de 2.000 produtores e xera 10.000 postos de traballo repartidos na produción, transformación, materias primas... ao que Telespazio agrega que hai que sumar o impacto que ten no sector da hostalería e restauración.

O estudo

O estudo desenvolveuse na primavera e no outono, xa que son os dous momentos clave na época de reprodución da fazula. Os drons cubriron as principais zonas costeiras onde se localiza a cría do mexillón nas provincias de Pontevedra e A Coruña, en voos desenvoltos a só 16 metros de altura durante a marea baixa e tomando imaxes destes lugares cunha resolución de 0,2 centímetros por píxel.

A análise destas imaxes mediante un algoritmo que utiliza intelixencia artificial, permitiu identificar a fazula cando esta alcanza un tamaño de 2,5 centímetros e outras especies, cunha efectividade de ata o 95%. Esta cifra é "susceptible de elevarse", xa que o sistema está preparado para aprender co uso e a análise de distintas superficies así como das irregularidades ou anomalías que puidesen aparecer.

Esta información, que cobre as fases de captura, catalogación, análise e explotación de datos relativos á evolución para a recollida da semente do mexillón, é a que terá a Xunta nun prazo de 15 días. Con ela poderá establecer un calendario adecuado de recollida da fazula para que os miticultores poidan facelo evitando ademais coincidir coa recolección doutras especies.

O proxecto 'Fazula', impulsado pola Xunta a través da 'Civil UAVs Initiative', unha iniciativa mediante a colaboración público-privada e a compra pública de innovación, xorde coa vocación de converterse en operacional, isto é, co obxectivo de financiar proxectos reais que teñan unha aplicación práctica para a sociedade.