Será unha das mellores experiencias que vivises, aquí en Galicia, unha oportunidade única de coñecer a terra dos teus pais e avós e a outros descendentes de emigrantes como ti, cos que compartir momentos, tamén con mozos galegos que che achegarán á realidade da comunidade.

Trátase de Conecta con Galicia, un programa de actividades ao aire libre para os galegos de entre 16 e 17 anos que vivides no exterior, un plan para interactuar, intercambiar experiencias e coñecer e sentir Galicia máis preto. 

Paréceche unha boa proposta para este verán? Pois isto é o que tes que saber.

É un programa da Secretaría Xeral dá Emigración que ofrece ata 50 prazas para que veñas a Galicia en xullo. A convocatoria abriu onte e tes 30 días para pedir a túa participación. Podes facelo a través da sede electrónica da Xunta.

A experiencia terá lugar no albergue xuvenil de Gandarío. Nestas instalacións realizaredes diferentes actividades lúdicas e deportivas, así como visitas culturais. Ademais, tamén poderedes coñecer empresas punteiras situadas en diversos lugares de Galicia.

Os que xa conectaron con Galicia anímanche a gozar dunha experiencia que che cambiará. Queres saber como o viviron os últimos participantes? Contámoscho aquí. E non deixes de ver o seguinte vídeo.