Hai proxectos que explican moi ben que significa facer país desde a innovación. Iniciativas que nacen en Galicia, miran ao mundo e, ao mesmo tempo, xeran emprego, industria e oportunidades no territorio. É o caso de WIM Studio, unha empresa galega que dará un paso decisivo no seu crecemento coa posta en marcha dunha nova planta industrial nas Pontes de García Rodríguez, orientada á valorización de residuos téxtiles e subproductos industriais.

A futura instalación ?duns 1.500 metros cadrados? permitirá escalar unha tecnoloxía desenvolta en Galicia que converte residuos en materiais de alto valor engadido. Un exemplo claro de como a economía circular deixa de ser un concepto para converterse en realidade produtiva, con impacto directo na contorna.

Dos residuos ao deseño: unha industria que non xera emisións

O corazón do proxecto é a tecnoloxía Recycled Textile Stone (RTS), un composite innovador elaborado a partir de residuos téxtiles fose de uso, resinas naturais e subproductos doutras industrias. Todo iso mediante un proceso que non require consumo de calor nin xera emisións directas de CO?, un aspecto especialmente relevante no contexto actual de descarbonización industrial.

Grazas a este sistema, a planta poderá tratar cada ano máis de 100 toneladas de residuo téxtil, unhas 130 toneladas de cuncha de mexillón e máis de 900 toneladas de xeso reciclado, integrando fluxos de residuos complexos nunha nova cadea de valor industrial.

Innovación que nace en Galicia? e queda

A nova planta das Pontes complementa o traballo que WIM Studio desenvolve desde 2024 no seu centro de innovación e prototipado do polígono de Alvedro, na Coruña. Desde alí impulsáronse proxectos pioneiros de valorización de residuos en colaboración con empresas galegas como Finsa ou Grupo Gestán, demostrando que a cooperación entre industria tradicional e innovación é unha das grandes fortalezas do tecido produtivo galego.

Esta aposta por crecer sen deslocalizar, reforzando a actividade industrial en Galicia, tradúcese tamén en emprego: o proxecto prevé a creación de 17 postos de traballo directos e máis de 20 indirectos, ademais dun investimento superior aos dous millóns de euros.

Galicia como polo de referencia en economía circular

Máis aló das cifras, o valor do proxecto está no seu significado. Converter residuos téxtiles, cunchas de mexillón ou xeso reciclado en materiais para a construción, o interiorismo ou o mobiliario é unha forma moi concreta de pechar ciclos, reducir impactos e xerar novas oportunidades económicas desde Galicia.

Iniciativas como esta consolidan á comunidade como un territorio capaz de liderar a transición cara a un modelo industrial máis sostible, innovador e arraigado ao territorio. Unha Galicia que transforma o que outros descartan en deseño, industria e futuro.