- Os importes ascenden a 10.800 euros e hai 108 prazas para que poidas cursar na nosa terra un ciclo de Formación Profesional: presenta a túa solicitude antes do 12 de maio
Se queres volver a Galicia e estás a pensar en cursar Formación Profesional, esta é a oportunidade que estabas a esperar. A Xunta acaba de abrir a convocatoria para solicitar algunha das 108 bolsas Retorna Talento FP para o próximo curso 2024/25, dirixidas a que os galegos do exterior poidades realizar estudos de Formación Profesional que vos permitan mellorar a vosa cualificación e volver a casa.
O Goberno galego destina case 1 millón de euros a esta iniciativa, que forma parte da Estratexia Galicia Retorna, coa que o Goberno galego quere incentivar a quen resides no estranxeiro -tanto emigrantes como descendentes destes- a elixir Galicia para completar a vosa formación e incorporarvos ao noso mercado laboral.
A través desta acción, búscase tamén que a sociedade galega enriquézase cos coñecementos e as experiencias profesionais internacionais que achegades quen resides ou nacestes no estranxeiro e que agora retornades a Galicia, ao mesmo tempo que se reforza a vosa vinculación coa Comunidade Autónoma.
Como novidade fronte ás convocatorias anteriores, amplíase a idade límite dos solicitantes, pasando dos 40 aos 45 anos, favorecendo así que un maior número de persoas galegas que queiran retornar a Galicia poidan facelo alcanzando unha formación profesional recoñecida que posibilite a súa incorporación ao mercado laboral.
FP Dual a distancia.
Nesta modalidade de FP Dual a distancia ofértanse 60 prazas para o próximo curso 2024/25. Neste caso, os seleccionados poderedes iniciar a vosa formación académica no voso país de orixe e completala coa parte práctica en empresas en Galicia, en función da estrutura dos dous cursos que compoñen cada ciclo.
Así pois, durante o primeiro curso, os estudantes realizaredes a primeira parte a distancia e unha segunda parte presencial nas empresas seleccionadas a través de convenios con firmas referentes das contornas dos centros e dos sectores correspondentes.
No segundo curso académico, haberá unha primeira parte en modalidade semipresencial no centro de formación e unha segunda parte presencial na empresa. Recibiredes unha bolsa de 10.800 euros cada un para afrontar os gastos asociados como a viaxe desde o seu país de orixe, aloxamento e manutención en Galicia e subscrición dun seguro médico, de ser o caso.
Os ciclos ofertados son os reflectidos na seguinte táboa:
| Municipio | Centro | Ciclo de FP Dual | Prazas |
|---|---|---|---|
| Ferrol | CIFP Ferrolterra | Ciclo superior de Deseño e amoblamento | 12 |
| A Coruña | CIFP Someso | Ciclo superior de Proxectos de edificación | 12 |
| Culleredo | CIFP Universidade Laboral | Ciclo superior de Desenvolvemento de proxectos de instalacións térmicas e de fluídos | 12 |
| Vilamarín | CIFP de Vilamarín | Ciclo superior de Xestión de aloxamentos turísticos | 12 |
| Redondela | IES de Chapela | Ciclo medio de Atención a persoas en situación de dependencia | 12 |
Formación específica básica
Nesta modalidade, ofértanse un total de 48 prazas para cursar Programas específicos básicos de FP durante o curso 2024/25. Neste caso a bolsa é de 6.500 euros por alumno/a e a relación de programas formativos ofertados é a seguinte:
| Municipio | Centro | Programa formativo de formación específica básica | Prazas |
|---|---|---|---|
| A Coruña | CIFP Someso | Albañilería e fontanería | 16 |
| Culleredo | CIFP Universidade Laboral | Fontanería, calefacción, electricidade e telecomunicacións en edificios | 16 |
| Ferrol | CIFP Ferrolterra | Fontanería, calefacción, electricidade e telecomunicacións en edificios | 16 |
Prazo ata o 12 de maio
O prazo de presentación de solicitudes está aberto ata o 12 de maio e deberán facerse a través da aplicación informática Ciclosadmisión. Os requirimentos son os establecidos na convocatoria: con carácter xeral non gozar destas bolsas en convocatorias anteriores, ser residente no estranxeiro e ter nacionalidade española, ter menos de 45 anos e ter algunha relación de orixe ou consanguinidade con Galicia.