Se estás a pensar en volver a Galicia e emprender o teu propio negocio, hoxe tes unha gran noticia: a nova convocatoria do Programa Retorno Emprendedor xa está publicada no Diario Oficial de Galicia (DOG). Cun orzamento inicial de 1 millón de euros, esta liña de axudas ofrece entre 6.000 e 10.000 € para apoiar a galegos e galegas do exterior que queiran regresar a casa e apostar polo autoemprego.

Más dunha década impulsando o retorno

Desde a súa posta en marcha en 2013, o Programa Retorno Emprendedor foi clave na dinamización económica de Galicia. Grazas a esta iniciativa, 810 persoas regresaron e puxeron en marcha os seus propios negocios en máis de 200 concellos, xerando emprego e riqueza en sectores tan diversos como a hostalería, o comercio, a industria 4.0, a enxeñería ou o deseño. En total, destináronse 5,4 millóns de euros para facilitar o regreso dos emprendedores, logrando un impacto económico significativo: cada iniciativa mobilizou un investimento medio de 53.722,66 euros no seu primeiro ano de actividade.

Ademais, o perfil dos beneficiarios reflicte o alto potencial desta medida: o 45 % ten estudos universitarios e máis da 70 % conta con experiencia no sector no que emprende. Isto demostra que o programa non só impulsa o retorno, senón que tamén fortalece o ecosistema empresarial galego con talento cualificado, innovación e valor engadido.

Quen pode beneficiarse da axuda?

A nova convocatoria, publicada hoxe no DOG, desenvólvese en réxime de concorrencia non competitiva, o que significa que se concederán as axudas por orde de solicitude ata esgotar os fondos dispoñibles. Para acceder a estas axudas, é necesario:

• Nacer en Galicia ou ser descendente de galegos.
• Retornar do estranxeiro para partir do 1 de xaneiro de 2023.
• Estar dado de alta no Réxime Especial de Traballadores Autónomos (RETA).
• Ter residencia e domicilio fiscal en Galicia.

A contía basee é de 6.000 €, pero pode incrementarse ata 10.000 € se o solicitante é muller ou se o negocio establécese nunha zona rural.

Un programa con impacto global

Desde a súa creación, este programa recibiu solicitudes de galegos procedentes de máis de 50 países dos cinco continentes, con especial presenza de retornados de Venezuela, Reino Unido, Arxentina, Suíza, México ou Brasil. En 2024, resolvéronse favorablemente 150 solicitudes de 29 países, destinando 1,2 millóns de euros a novos proxectos, cunha ampliación orzamentaria do 25 % para atender todas as peticións.

Un dos datos máis destacables é que o 85 % destes negocios asentáronse en municipios rurais, contribuíndo á revitalización de zonas menos poboadas e á diversificación económica do territorio. Ademais, o emprendemento feminino segue en aumento, consolidando a paridade de xénero nesta última convocatoria.

Más apoio para emprender en Galicia

O Programa Retorno Emprendedor forma parte da Estratexia Galicia Retorna, un ambicioso plan dotado con 450 millóns de euros ata 2026 co obxectivo de facilitar o regreso de 30.000 galegos do exterior. Ademais destas axudas, a Xunta impulsa outras iniciativas para fomentar a inserción laboral dos retornados, como:

• Bolsas BEME: Permiten a mozos do exterior cursar un máster en Galicia e facilitar o seu acceso ao mercado laboral. A convocatoria 2025 está aberta ata o 30 de abril.
• Programa Retorna Cualifica Emprego: Cun orzamento de 2,3 millóns de euros, busca axudar a 200 residentes no exterior menores de 55 anos a atopar emprego en Galicia ata finais de 2025.
• Axudas extraordinarias ao retorno: Xa beneficiaron a 4.500 familias cun orzamento total de 13 millóns de euros.

Ademais, os beneficiarios do Programa Retorno Emprendedor poden contar con apoio adicional a través da Rede de polos de emprendemento, con 15 oficinas en toda Galicia que ofrecen asesoramento e tutorización personalizada para garantir o éxito dos novos negocios.

Volve a casa e emprende en Galicia!

Galicia é terra de oportunidades e agora é o momento perfecto para regresar e construír o teu futuro aquí. Se tes unha idea de negocio e queres desenvolvela na túa terra, esta axuda pode ser o impulso que necesitas.

Consulta toda a información no DOG e non deixes pasar esta oportunidade de volver a casa co mellor respaldo posible. Galicia espérache cos brazos abertos!