Galicia multiplica a súa aposta polo retorno. E faio cunha nova actuación: a primeira Oficina Móbil de Atención ás Persoas Emigrantes Retornadas. Un punto de encontro no que todos os que volvésedes a casa podedes atopar, de primeira man, información, asesoramento e axuda sobre as diferentes materias que vos preocupan, respondendo así as demandas e necesidades derivadas do retorno.

Durante os próximos meses, esta Oficina percorrerá Galicia, estendendo o seu alcance a cada recuncho da nosa terra. Un esforzo que permitirá achegar os servizos e apoios necesarios para unha integración efectiva de quen retornaches, abarcando as vilas do rural galego e a súa zona de influencia. Os diferentes concellos de Galicia recibirán a visita desta oficina itinerante, asegurando que ninguén quede sen acceso ás ferramentas e recursos necesarios para facilitar o seu retorno a Galicia.

Esta oficina móbil, que complementará ás oficinas permanentes xa existentes, ofrecerá unha ampla gama de servizos:

Asesoramento Personalizado

Persoal profesional cualificado proporcionarán orientación individualizada sobre os procesos e requisitos necesarios para un retorno exitoso, axudando a navegar polas complexidades administrativas.

Información sobre Programas de Retorno

A oficina facilitará información detallada sobre programas de apoio deseñados para axudar aos emigrantes no seu regreso e adaptación a Galicia, incluíndo axudas económicas, programas de inserción laboral, e máis.

Xestión de Trámites

Este servizo prestará apoio aos interesados na xestión os diferentes trámites administrativos necesarios para o retorno.

Orientación Laboral e Profesional

A oficina ofrecerá asesoramento en canto a oportunidades de emprego en Galicia, así como orientación para a validación de títulos estranxeiros e a inserción profesional no comprado laboral galego.

Soporte en Materia de Vivenda e Educación

A oficina proporcionará información sobre opcións de vivenda e detalles sobre o sistema educativo galego, esenciais para as familias que retornan con nenos.

A oficina móbil resulta máis accesible para toda a poboación retornada grazas á súa capacidade de desprazarse as diferentes localizacións, achegando estes valiosos servizos ás persoas que se atopen lonxe das oficinas permanentes ( Santiago de Compostela, A Coruña, Lugo, Ourense e Vigo). Con este novo recurso, a Secretaría de Emigración reafirma o seu compromiso con facilitar o retorno dos galegos e as súas familias, fortalecendo os lazos coa comunidade galega no mundo.