Se levas tempo pensando en volver a Galicia, quizá estes días fosen un sinal de que ese proxecto está máis preto de facerse realidade. As feiras de emprego impulsadas pola Xunta en Brasil, celebradas os días 6 de xuño en São Paulo e 8 de xuño en Salvador de Baía, volveron a demostrar que existe unha ponte cada vez máis sólido entre o talento galego no exterior e as oportunidades laborais que ofrece Galicia.

Durante ambas as xornadas, centos de persoas tiveron a oportunidade de coñecer de primeira man as vacantes que actualmente necesitan cubrir empresas galegas en sectores tan diversos como a construción, a hostalería, a loxística, a industria, as enerxías renovables, o naval, o metal ou as tecnoloxías da información.

A cita de Salvador de Baía, celebrada na sede do Club Español, puxo o broche final a unha iniciativa que busca algo máis que cubrir postos de traballo: facilitar que os galegos e galegas do exterior poidan regresar cun proxecto profesional estable e con apoio durante todo o proceso.

Un retorno con emprego e acompañamento

As feiras forman parte do programa Retorna Cualifica Emprego, unha das iniciativas incluídas na Estratexia Galicia Retorna. O seu obxectivo é que o regreso a Galicia non sexa unha aventura incerta, senón unha decisión apoiada por oportunidades laborais reais.

Actualmente, preto de 70 empresas galegas participan nesta edición do programa e ofertan máis de 500 postos de traballo. Unha cifra que reflicte a necesidade de talento existente en moitos sectores da economía galega e, ao mesmo tempo, as posibilidades que se abren para quen desexa volver.

Pero o programa vai máis aló da procura de emprego. Durante as feiras, os asistentes recibiron información personalizada sobre axudas, trámites administrativos, acceso a vivenda e medidas de integración social e laboral. Porque regresar implica moito máis que atopar traballo: supón reorganizar unha vida, recuperar vínculos e comezar unha nova etapa.

Galicia necesita talento

A experiencia das edicións anteriores demostra que este modelo funciona. Nas dúas convocatorias previas de Retorna Cualifica Emprego, ao redor de 400 galegos e galegas regresaron desde 21 países distintos para incorporarse ao mercado laboral galego. Fixérono acompañados das súas familias, sumando máis de 160 familiares que tamén iniciaron unha nova vida en Galicia.

Procedían de países tan diversos como Arxentina, Uruguai, Venezuela, Cuba, Brasil, Colombia, México, Alemaña, Suíza ou Reino Unido, e hoxe traballan en sectores tan variados como a hostalería, a construción, a industria, o comercio, os servizos ou o ámbito agrogandeiro.

Detrás de cada cifra hai historias persoais de retorno, de reencontro coa terra de orixe e de novas oportunidades para desenvolver un proxecto de vida en Galicia.

Más información para quen quere volver

Ademais das ofertas de emprego, as feiras serviron para achegar aos asistentes información sobre outros recursos dispoñibles para quen estea valorando o regreso. Técnicos de distintos departamentos da Xunta explicaron as axudas existentes, as oportunidades profesionais no ámbito da investigación e a innovación, así como os programas de apoio destinados a facilitar a integración das persoas retornadas.

Con clausúraa da feira de Salvador de Baía conclúe tamén a visita institucional que levou estes días a representantes da Xunta a São Paulo, Santos e Salvador, onde mantiveron encontros con entidades da colectividade galega e reforzaron os lazos históricos que unen Galicia e Brasil.

Para moitos asistentes, estas xornadas foron unha oportunidade para resolver dúbidas. Para outros, o primeiro paso dun regreso que levaban anos imaxinando. E para Galicia, unha nova ocasión para recuperar talento, experiencia e vínculos que nunca deixaron de formar parte da súa historia.